АЖК электрмонтерлерінің кәсіби шеберлігі сыналды

"Алатау Жарық Компаниясы" АҚ Электр Тораптары ауданының ұйымдастыруымен электрмонтерлер арасында кәсіби шеберлік жарысы өтті. Іс-шара сала мамандарының біліктілігін арттыру, тәжірибе алмасу және кәсіби дағдыларын жетілдіру мақсатында өткізілді.

18 команда бақ сынасқан жарыс 6 кезеңнен тұрды. Олардың әрқайсысы нақты өндірістік жағдайларды қамтып, қатысушылардың теориялық білімдерімен қатар, практикалық шеберліктерін де бағалауға мүмкіндік берді. Қатысушылар апаттық жағдайларды жою, электр қондырғыларын қауіпсіз іске қосу, техникалық құжаттамамен жұмыс істеу, биікте жұмыс істеу ережелері және алғашқы медициналық көмек көрсету дағдылары бойынша сынаққа түсті. 

Жарысқа аудандық бөлімшелерден құралған командалар қатысып, әр кезеңде өзара бақ сынасты. Сарапшылар алқасы қатысушылардың әрбір іс-қимылын мұқият бағалап, қауіпсіздік техникасын сақтау мен жұмыстың сапасына ерекше мән берді.

"Бұл жарыс – тек сайыс емес, тәжірибе мен білімді ұштастыратын маңызды алаң", – дейді Басқарма Төрағасы Абай Асылов.

Бес күнге созылған жарыс қорытындысы бойынша жеңімпаздар анықталып, арнайы дипломдармен және бағалы сыйлықтармен марапатталды. Бас жүлде - автокөлікті 5 Электр Тораптары Ауданы жеңіп алды. 
1 орын - Қарасай Электр Тораптары Ауданына, 2 орын - Жамбыл Электр Тораптары Ауданына, 
3 орын - Қонаев Электр Тораптары Ауданы, 3 Электр Тораптары Ауданы, 7 Электр Тораптары Ауданынына бұйырды.